சர்வேச்வர தரிசனம்

1.  சக்கர மங்கை :  தஞ்சாவூர் – கும்பகோணம் சாலையில் ஐயம்பேட்டையில்.  சக்கரப்பள்ளி என அழைக்கப்படுகிறது.  இறைவனின் திருமுடி கண்டேன் என்று பொய் சொன்ன பிரம்மன் சக்ரவாகப் பறவையாக, அவன் சக்தி பிராம்மி புரட்டாசி மாதத்து அமாவாசையை அடுத்த பிரதமையில் வழிபட்ட தலம். தேவ நாயகி ஸமேத சக்ரவாகேச்வரர்.  நாதசர்மா, அனவித்தை தம்பதியருக்கு அம்பாள் பேதை பருவத்தில் காட்சி.  இறைவனின் நேத்ர தரிசனம்.

2.  அரிமங்கை :  சக்கரப்பள்ளியிலிருந்து 1 கி. மீ.  ஞானாம்பிகை ஸமேத ஹரிமுக்தீச்வரர்.  மகேச்வரி துவிதியையில் வழிபட்ட தலம்.  நாதசர்மா, அனவித்தை தம்பதியருக்கு அம்பாள் பெதும்பை பருவத்தில் காட்சி.  இறைவனின் கங்கை தரிசனம்.

3.  சூலமங்கை :  ஐயம்பேட்டையிலிருந்து 2 கி. மீ.  அலங்காரவல்லி ஸமேத க்ருத்திவாகேச்வரர்.  கௌமாரி திருதியையில்  வழிபட்ட தலம்.  நாதசர்மா, அனவித்தை தம்பதியருக்கு அம்பாள் மங்கை பருவத்தில் காட்சி.  இறைவனின் திரிசூல தரிசனம்.

4. நந்திமங்கை :    ஐயம்பேட்டையிலிருந்து 3 கி. மீ. ( நல்லிச்சேரி). அகிலாண்டேச்வரி ஸமேத ஜம்புகேச்வரர்.  வைஷ்ணவி சதுர்த்தியில் வழிபட்ட தலம்.  நாதசர்மா, அனவித்தை தம்பதியருக்கு அம்பாள் கன்னி பருவத்தில் காட்சி.  இறைவனின் திருவடி தரிசனம்.

5.  பசுமங்கை :  பசுபதிகோயில்.  பால்வளை நாயகி ஸமேத பசுபதீச்வரர்.  வராகி பஞ்சமியில்  வழிபட்ட தலம்.  நாதசர்மா, அனவித்தை தம்பதியருக்கு அம்பாள் அரிவை பருவத்தில் காட்சி.  இறைவனின் உடுக்கை தரிசனம்.

6.  தாழ மங்கை :  பசுபதி கோயில் அருகே. ராஜராஜேச்வரி ஸமேத சந்த்ரமௌலீச்வரர்.  இந்திராணி ஷஷ்டியில் வழிபட்ட தலம்.  நாதசர்மா, அனவித்தை தம்பதியருக்கு அம்பாள் தெரிவை பருவத்தில் காட்சி.  இறைவனின் பிறை தரிசனம்.

7.  புள்ள மங்கை : பசுபதி கோயிலிலிருந்து 1 கி. மீ.  (வெள்ளாள பசுபதி கோயில்).  சௌந்தர நாயகி ஸமேத ஆலந்துறை நாதர்.  சாமுண்டி சப்தமியில்  நாதசர்மா, அனவித்தை தம்பதியருக்கு அம்பாள் பேரிளம்பெண் பருவத்தில் காட்சி.  இறைவனின்  நாக தரிசனம்.

திருவையாறு போலவே இங்கும் பங்குனி மாத சித்திரை நட்சத்திரத்தில் சப்தஸ்தான உற்சவம் நடைபெறுகிறது.   நாதசர்மா, அனவித்தை தம்பதியர், இவ்வேழூர் தரிசனம் செய்து மாயூரத்தில், கௌரி மயூர நாதரை வழிபட்டு சிவபதம் அடைந்தனர்.  இவ்வாறு நேத்ரம், கங்கை, திரிசூலம், திருவடி, உடுக்கை, பிறை, நாகம் என்னும் இறைவனின் எல்லா தரிசனமும் பெறுவது சர்வேச்வர தரிசனம் ஆகும்.